រដ្ឋបាលខេត្តស្ទឹងត្រែងប្រជុំត្រួតពិនិត្យវឌ្ឍនភាពការងាររដ្ឋបាលប្រចាំខែកញ្ញនិងត្រីមាសទី៣ ឆ្នាំ២០១៩និងលើកទឹសដៅការងារបន្ត

ឯកឧត្តម ម៉ុម សារឿន អភិបាលនៃគណៈអភិបាលខេត្តស្ទឹងត្រែង កាលពីព្រឹកថ្ងៃទី០៣ ខែតុលា ឆ្នាំ២០១៩ នេះ បានដឹកនាំកិច្ចប្រជុំត្រួតពិនិត្យវឌ្ឍនភាពការងារប្រចាំខែកញ្ញានិងត្រីមាសទី៣ឆ្នាំ២០១៩ និងលើកទឹសដៅការងារបន្តសម្រាប់ខែតុលា ឆ្នាំ២០១៩ របស់រដ្ឋបាលខេត្តស្ទឹងត្រែង ដែលមានការចូលរួមពីមន្ទីរអង្គភាពពាក់ព័ន្ធនាៗក្នុងខេត្ត។
កិច្ចប្រជុំនេះ ធ្វើឡើងក្នុងគោលបំណងត្រួតពិនិត្យវឌ្ឍនភាពការអនុវត្តការងាររបស់រដ្ឋបាលខេត្តប្រចាំខែកញ្ញា និងត្រីមាសទី៣ ព្រមទាំងត្រួតពិនិត្យលទ្ធផលការងារសម្រេចបានតាមរយះការអនុវត្តសកម្មភាពការងាររបស់មន្ទីរវិស័យ សមត្ថកិច្ចជំនាញ ចំណុះរដ្ឋបាលខេត្តស្ទឹងត្រែង ក្នុងការរក្សាសុខសណ្តាប់ធ្នាប់និងផ្តល់សេវាសាធារណៈជូនប្រជាពលរដ្ឋឲ្យមានប្រសិទ្ធិភាព និងស្របតាមគោលនយោបាយអភិវឌ្ឍន៍ជាតិរបស់រាជរដ្ឋាភិបាលកម្ពុជា។
ឯកឧត្តម ម៉ុម សារឿន អភិបាលនៃគណៈអភិបាលខេត្តស្ទឹងត្រែងបានមានប្រសាសន៍កោតសរសើរចំពោះការខិតខំប្រឹងប្រែងរួមចំណែកអភិវឌ្ឍន៍ខេត្តរបស់មន្ត្រីរាជការគ្រប់លំដាប់ថ្នាក់ដែលបានចូលរួមយ៉ាងសកម្មក្នុងការកសាងខេត្តនាំឲ្យខេត្តសម្រេចបាននូវសមិទ្ធិផលផ្លែផ្កាជាបន្តបន្ទាប់ រក្សាបាននូវសន្តិសុខសណ្តាប់ធ្នាប់សាធារណៈ ការផ្តល់សេវាសាធារណៈបានទាន់ពេលវេលា ឈានទៅរកការកាត់បន្ថយភាពក្រីក្រជូនប្រជាពលរដ្ឋ ។
ក្នុងឱកាសនោះឯកឧត្តមក៏នៅតែក្រើនរំលឹកថ្នាក់ដឹកនាំមន្ទីរអង្គភាព និងមន្ត្រីរាជការទាំងអស់ទូទាំងខេត្តស្ទឹងត្រែងសាមគ្គីភាពគ្នា ឯកភាពគ្នា បន្តលើកកម្ពស់សេវាសាធារណៈអោយកានតែមានប្រសិទ្ធិភាព ទប់ស្កាត់អោយបានរាល់បទល្មើសនាៗពង្រឹងសន្តិសុខសណ្តាប់ធ្នាប់សាធារណៈបន្ថែមទៀតតាមរយះការអនុវត្តគោលនយោបាយភូមិ ឃុំ មានសុវត្ថិភាពអោយបានស៊ីជម្រៅ ក្តាប់អោយបាននូវសភាពការមិនប្រក្រតីណាមួយដែលមានបំណងចង់ផ្តួលរំលំរាជរដ្ឋាភិបាលស្របច្បាប់ ធ្វើយ៉ាងណារក្សាការពារអោយបាននូវជាតិ សាសានា ព្រះមហាក្សត្រ និងរាជរដ្ឋាភិបាលស្របច្បាប់ដែលដឹកនាំដោយសម្តេចអគ្គមហាសនាបតិតេជោ ហ៊ុន សែន។