ឯកឧត្តម ម៉ុម សារឿន អញ្ជើញចុះសួរសុខទុក្ខស្រ្តី ទារក និងកុមារដែលកំពុងសម្រាកព្យាបាលនៅមន្ទីរពេទ្យបង្អែកខេត្តស្ទឹងត្រែង

ដោយឈរលើស្មារតីទទួលខុសត្រូវខ្ពស់ ក្នងនាមជាថ្នាក់ដឹកនាំមួយរូប នៅរសៀលថ្ងៃទី៣០ ខែមិថុនា ឆ្នាំ២០១៩កន្លងទៅថ្មីៗនេះ ឯកឧត្ដម ម៉ុម សារឿន អភិបាលនៃគណៈអភិបាលខេត្ត និងជាប្រធានកិត្តិយសកាកបាទក្រហមកម្ពុជាខេត្តស្ទឹងត្រែង អមដំណើរដោយឯកឧត្តម ឈាង ឡាក់ ប្រធានក្រុមប្រឹក្សាខេត្ត និងជាប្រធានគណៈកម្មាធិការសាខាខេត្ត រួមទាំងមន្ត្រីរាជការជុំវិញខេត្ត បានអញ្ជើញចុះសួរសុខទុក្ខស្រ្តី កុមារតូចៗ ដែលមានជំងឺកំពុងសម្រាកព្យាបាលនៅមន្ទីរពេទ្យ បង្អែកខេត្ត ដែលមានការកើនឡើងគួរឲ្យកត់សម្គាល់ ជាពិសេសជំងឺគ្រុនឈាម។

ក្នុងឱកាសនោះ ឯកឧត្តមប្រធានកិត្តិយស បានពាំនាំប្រសាសន៍ផ្តាំផ្ញើសួរសុខទុក្ខពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជានិច្ចកាលសម្តេចតែងគិតគូរពីសុខទុក្ខ សុខភាពរបស់ប្រជាពលរដ្ឋគ្រប់ពេលវេលា ជាពិសេសស្រ្តី ទារក និងកុមារដែលជានងាយរងគ្រោះដែលរាជរដ្ឋាភិបាលកម្ពុជាបានយកចិត្តទុកដាក់ខ្ពស់ ក្នុងការការពារនិងព្យាបាល។

ឯកឧត្ដមមានប្រសាសន៍ផ្តាំផ្ញើរទៅកាន់ប្រជាពលរដ្ឋដែលកំពុងព្យាបាលជំងឺក្នុងមន្ទីរពេទ្យបង្អែកខេត្តស្ទឹងត្រែងថា សូមឱ្យបងប្អូនទាំងអស់នាំថែទាំសុខភាពឱ្យបានល្អ ត្រូវរស់នៅប្រកដោយអនាម័យជុំវិញខ្លួន ទាំងការដេកដើរ និងបរិភោគអាហារនានា ត្រូវមានអានាម័យ និងប្រុងប្រយ័ត្នឲ្យបានខ្ពស់។ ឯកឧតុ្តមបន្ថែមថាដើម្បីឲ្យកាន់តែសុវត្តិភាពនិងចៀសវៀងមិនឲ្យមានការឆ្លងជំងឺផ្សេងៗ ពីសត្វល្អិតឬមូសខាំជាដើមមាតាបិតាកុមារតូចៗ ត្រូវស្លៀកពាក់ខោអាវវែងឲ្យបានត្រឹមត្រូវជាប់ប្រជាចាំ ព្រមទាំងត្រូវដេកនៅក្នុងមុងជ្រលក់ថ្នាំជានិច្ច។

ឯកឧត្តម ម៉ុម សារឿន អភិបាលខេត្តស្ទឹងត្រែងក៏បានណែនាំផងដែរទៅកាន់ក្រុមគ្រូពេទ្យត្រូវបង្កើនការយកចិត្តទុកដាក់ព្យាបាលដល់អ្នកជំងឺទាំងអស់ដែលកំពុងសម្រាក់ព្យាបាលក្នងមន្ទីរពេទ្យបង្អែកខេត្តស្ទឹងត្រែង ហើយមិនត្រូវទុកចោលអ្នកជំងឺណាម្នាក់ឲ្យមានបញ្ហា ដោយមិនទទួលខុសត្រូវនោះឡើយ។

ឆ្លៀតឱកាស ចុះសួរសុខទុក្ខស្រ្តី ទារក និងកុមារដែលកំពុងសម្រាកព្យាបាលនៅមន្ទីរពេទ្យបង្អែកខេត្តស្ទឹងត្រែង ឯកឧត្តម ម៉ុម សារឿន អភិបាលខេត្តនិងជាប្រធានកិត្តិយសកាកបាទក្រហមកម្ពុជាខេត្តស្ទឹងត្រែង បាននាំយកនូវថវិការរបស់សម្តេចអគ្គមហាសេនាបតីតេជោហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជានិងថវិការរបស់គណៈកម្មាធិការសាខាកាកបាទក្រកម្ពុជាខេត្ត រួមទាំងថវិការសប្បុរសជននានាផ្តល់ជូន កុមារនិងស្រ្តីកំពុងសម្រាក់ព្យាបាលជំងឺសរុបចំនួន ១៨៣នាក់ ក្នុងម្នាក់ទទួលបាន ១២០.០០០រៀល ក្នុងនោះដែលក៏បានផ្តល់ជូនមន្ទីរពេទ្យបង្អែកខេត្តថវិកា ២.០០០.០០០រៀល ។

សូមបញ្ជាក់ថា បើតាមរបាយការណ៍ប្រចាំសប្តាហ៍ទី២៥ គិតចាប់ពីថ្ងៃទី១៩ ដល់ថ្ងៃទី២៥ ខែមិថុនា ឆ្នាំ២០១៩ របស់មន្ទីរសុខាភិបាលខេត្តស្ទឹងត្រែងបង្ហាញថា មានអ្នកជំងឺទូទៅសរុប២៧៤នាក់។ ក្នុងនោះអ្នកជំងឺគ្រុនក្តៅស្រួចស្រាវ និងមានសញ្ញាចេញឈាម សង្ស័យមានឆ្លងជំងឺគ្រុនឈាមមានប្រមាណ២៥៦នាក់ ស្រី១២៧នាក់។ ខណៈគ្រែសម្រាប់ឲ្យអ្នកជំងឺសម្រាកនៅក្នុងមន្ទីរពេទ្យបង្អែកខេត្តមានចំនូនតែជាង១០០គ្រែប៉ុណ្ណោះ៕